四十歲嘅阿 May 兩年前為咗減肥，做咗「胃繞道手術」（Gastric Bypass），成功減咗幾十磅，個人自信晒。但最近佢突然腰痛到標冷汗，嚟到急症室照 CT，發現兩邊腎都有結石，其中一粒仲跌咗落輸尿管。佢好唔明白：「我而家食得好清淡，又瘦咗咁多，點解反而會生腎石？」其實，阿 May 嘅情況喺醫學上叫「腸源性高草酸尿症」（Enteric Hyperoxaluria）——佢嘅腎石，正正係因為佢個腸胃手術而起嘅。
腸胃同腎石有咩關係？「脂肪」同「鈣」嘅三角戀
要明白呢個關係，首先要講吓正常人食嘢落肚之後發生咩事。我哋食嘅嘢入面有「草酸」（例如菠菜、堅果）同「鈣」。正常情況下，草酸同鈣會喺腸道入面結合，變成唔溶於水嘅草酸鈣，然後跟住大便排出體外，唔會入血。
但係，當一個人做過某啲腸胃手術（例如切咗部分腸、或者做咗繞道），腸道吸收脂肪嘅能力就會變差。大量未消化嘅脂肪留喺腸道入面，呢啲脂肪好鍾意黐住鈣。結果，鈣俾脂肪搶走晒，原本應該同鈣結合嘅草酸就變成「自由身」。呢啲游離嘅草酸會被腸道大量吸收，進入血液，最後去到腎臟。當腎臟要排走大量草酸，佢哋就會喺尿液入面同鈣結合，形成草酸鈣結石。
邊啲手術或疾病係高危？
除咗阿 May 做嘅減重胃繞道手術（Roux-en-Y Gastric Bypass），以下情況都會大大增加生腎石嘅風險：
- 克隆氏病（Crohn's Disease）：因為發炎或者手術切除咗末端迴腸。
- 短腸症候群（Short Bowel Syndrome）：因為各種原因切除咗大量小腸。
- 潰瘍性結腸炎（Ulcerative Colitis）：做咗全結腸切除加迴腸儲袋手術（J-pouch）。
- 慢性胰臟炎或膽道疾病：影響脂肪消化。
呢類病人唔單止容易生石，而且生石嘅速度可以好快，甚至會因為反覆結石同腎鈣化，影響腎功能。
手術後點樣預防腎石？
如果做過呢類手術，預防腎石嘅策略同普通人有啲唔同，要特別針對「腸道吸收草酸」呢個源頭：
- 隨餐補充鈣質：呢個係最重要嘅一步！食飯嗰陣食鈣片（例如碳酸鈣），目的唔係為咗補骨，而係等啲鈣喺腸道入面做「替死鬼」，綁住食物入面嘅草酸，等佢哋跟大便排走。
- 低草酸飲食：盡量少食菠菜、紅菜頭、堅果、朱古力、濃茶等高草酸食物。
- 低脂飲食：減少腸道入面未消化嘅脂肪，等脂肪唔好搶走啲鈣。
- 飲大量水：每日最少飲 2.5 至 3 公升水，稀釋尿液。
- 補充檸檬酸鉀：呢類病人嘅尿液通常偏酸，而且缺乏檸檬酸（一種可以防止結石形成嘅物質）。醫生可能會處方檸檬酸鉀藥水或藥丸，鹼化尿液同預防結石。
醫生嘅建議：
做完減重手術或者腸道切除手術嘅病人，除咗要跟進體重同營養吸收，強烈建議要做一次「二十四小時尿液分析」。呢個檢查可以準確量度尿液入面嘅草酸、鈣、檸檬酸同酸鹼度，等醫生可以度身訂造預防方案，唔好等到痛先知生石。
常見問題
點解做完腸胃手術會容易生腎石？
因為腸道吸收脂肪嘅能力變差，未消化嘅脂肪會喺腸道同鈣結合。原本應該同鈣結合並排出體外嘅草酸，就會變成「自由身」，被腸道大量吸收，經血液去到腎臟，同鈣結成草酸鈣結石。
邊啲腸胃手術之後要特別留意腎結石？
風險較高嘅包括：減重用嘅胃繞道手術、克隆氏病嘅迴腸切除、短腸症候群，以及潰瘍性結腸炎全結腸切除後嘅迴腸儲袋手術。
腸胃手術後點樣預防腎結石？
重點係飲夠水、隨餐補充鈣質（等鈣喺腸道綁住草酸）、低草酸同低脂飲食，並定期驗尿同照腎，醫生亦可能處方檸檬酸鉀。
阿 May 而家每日帶住個大水樽返工，飲食上都調整咗，半年後覆查尿液，草酸水平已經回落。佢笑住話：「減咗肥，唔想換嚟一腎石。」呢個正正係我寫呢篇文嘅目的——手術成功唔代表完場，術後嘅跟進同預防，先係長遠健康嘅保證。
崔家倫醫生 泌尿外科專科
本文只作公共健康教育用途，不能取代醫生診斷。如有疑問，請向你的醫生查詢。
Katherine Kot
